उदयपुर । उदयपुरका एक शिक्षकले विद्यार्थीमाथि कुटपिट गरेको खबर अहिले सामाजिक सञ्जालभर छताछुल्ल भएको छ । जिल्लाको उदयपुर रौतामाई वडा नम्बर ३ स्थित जनता माध्यमिक विद्यालय लाफागाउँका शिक्षक बिमानसिंह खड्काले शिक्षण सिकाईको क्रममा छात्रलाई थप्पड हानेको आरोप लागेपछि चौतर्फी आलोचना भइरहेको छ ।
जिल्लास्थित बिभिन्न विद्यार्थी संगठनहरुले समेत शिक्षकबाट मरसन्न हुने गरी कुटपिट गरिएको भन्ने हल्ला फैल्याइएको छ । तर, प्रत्यक्षदर्शी एक विद्यार्थीका अनुसार शिक्षक खड्काले ती विद्यार्थीलाई ‘रटेर आउन भनिएको मौखिक गृहकार्य’को जवाफ दिन नसक्दा तीन थप्पड हानेका थिए ।
सो क्रममा गृहकार्यमा भनिए अनुसार रटेर नआउने (प्रश्नको जवाफ दिन नसक्ने) अन्य विद्यार्थीलाई पनि शिक्षकले गालामा थप्पड हानेका थिए । सो क्रममा कक्षा ९ मा अध्ययनरत विद्यार्थी पुष्पराज बस्नेतको भने नाथ्री फुटेपछि रगत बगेको थियो । नाकबाट रगत बग्न थालेलगतै बेहोस् भएका बस्नेतलाई प्राथमिक उपचारपछि सदरमुकाम गाईघाटस्थित स्थानीय रौता हस्पीटल भर्ना गरिएको थियो ।
सोमबार राती नै भर्ना गरिएका उनको शरिरमा बाह्य चोट नदेखिएको उपचारमा संलग्न एक स्वास्थ्यकर्मीले बताए । शरीर बाहीरी भागमा चोट नदेखिए पनि नाथ्री फुटेर रगत आएको हुनाले टाउँकामा केही समस्या हुनसक्ने भन्दै अभिभावकको समन्वयमा स्वय शिक्षक बिमानसिंहले आफ्नो विद्यार्थीको उपचारका लागि मोरङको बिराटनगरस्थित न्यूरो हस्पीटल लिएर गएका छन् ।
राती नै अस्पताल ल्याइएका उनलाई आज (मंगलबार) मध्यान्ह १२ः०० बजे बिराटनगर रेफर गरिएको रौता हस्पीटल प्रशासनले जनाएको छ । शिक्षक खड्काले पुष्पराजसँगै थप्पड हानेका अन्य विद्यार्थी भने सामान्य छन् । घटनापछि एक पक्षले शिक्षण सिकाईको क्रममा हुने शारीरिक यातना गलत भएको प्रतिक्रिया दिएका छन् भने अर्काथरीले शिक्षणको क्रममा हुने सामान्य त्रुटीमाथि राजनीति गर्न नहुने भनाई सामाजिक सञ्जालमा बाँडीएको देखिन्छ ।
प्रतिकृया दिनुहोस्