गाईघाट / उदयपुरमा नेपाली कांग्रेसका नेता डा.शेखर कोइराला आउने भएका छन् । सदरमुकाम गाईघाटमा आयोजना हुने कार्यक्रमलाई संवोधन गर्नका लागि प्रमुख अथितिको रुपमा नेता कोइराला उदयपुर आउन लागेका हुन् । भोलि शनिवार गाईघाट स्थित विपि चोकमा नेपाली कांग्रेस त्रियुगा नगरपालिका वडा न. ११ को आयोजनामा कांग्रेसका संस्थापक नेता विशेश्वर प्रसाद कोइरालाको शालिक अनावरण गर्ने कार्यक्रम रहेको त्रियुगा नगर प्रमुख बसन्त कुमार बस्नेतले जानकारी दिए ।
नगर प्रमुख बस्नेतले कार्यक्रममा कोशी प्रदेशका सबै जिल्लाको पार्टी सभापति नेपाली कांग्रेस बाट निर्वाचित जनप्रतिनिधि, केन्द्रिय नेताहरु साथै जिल्लाका सम्पूर्ण नेता तथा कार्यकर्ताहरुको उपस्थिति रहने बताए ।
नेपालमा प्रजातन्त्रको स्थापनाका लागि कठोर संघर्ष गरेका कोइरालालाई नेपालका सबैजसो नेताहरु राजनितीक गुरु एवं प्रेरणाका पर्यायका रुपमा लिने गरेको र नेकपा एकालेका तत्कालीन महासचिव मदन भण्डारीले समेत आफूलाई मनपर्ने नेताहरूको सूचीमा विपी कोइरालाको नाम पहिलो नम्बरमा राख्ने गरेका थिए सोहि अनरुप मदन भण्डारी राजमार्ग अन्तर्गत पर्ने गाईघाट बजारमा विशेश्वर प्रसाद कोइरालाको शालिक अनावरण गर्न लागेको बस्नेतले जनाकारी दिए ।
कांग्रेसका नेता गुरु घिमिरे, कोशी प्रदेशका महामन्त्री उमेश थापा, लगाएत नेपाली कांग्रेसका सुभेच्छुक संस्थाहरुको समेत सहभागीता रहने नेपाली कांग्रेस त्रियुगा नगरपालिका वडा नम्बर ११ वडा समितिले जनाए ।
प्रतिकृया दिनुहोस्