विज्ञान पराजुली
श्रावण ७, उदयपुर / जिल्ला ट्राफिक प्रहरी कार्यालय उदयपुरले गत आर्थिक बर्षको तुलनामा २८ लाख बढी राजस्व संकलन गरेको छ । आर्थिक बर्ष २०७८/०७९ मा २३ हजार ६ सय ५० वटा सवारी कारवाहीबाट १ करोड ५२ लाख १७ हजार राजस्व सङ्कलन गरेको ट्राफिक उदयपुरले आर्थिक बर्ष २०७९/०८० मा २६ हजार चार सय ५० सवारी कारवाहिबाट एक करोड ८० लाख नौ हजार ७ सय ५० रुपैया राजश्व संकलन गरेको जिल्ला ट्राफिक प्रहरी कार्यालय उदयपुरका प्रमुख बरिष्ठ प्रहरी नायव निरिक्षक लोक बहादुर दियालिले जानकारी दिनु भयो ।
ट्राफिक प्रहरी उदयपुरको सक्रियता बढे संगै गत आर्थिक बर्षको तुलनामा यो बर्ष सवारी दुर्घटनामा मृत्यु, गम्भीर घाइते , र सामान्य घाइतेको संख्यामा समेत कमि आएको छ । गत बर्ष ३५७ वटा सवारी दुर्घटनामा ४४ जनाको मृत्यु , १०२ जना गम्भीर घाइते , र ४८३ जना सामान्य घाइते भएकोमा यो बर्ष २४०वटा सवारी दुर्घटना , ३४ को मृत्यु , ८१ गम्भीर घाइते र २६६ सामान्य घाइते भएको उदयपुर ट्राफिकले जनाएको छ।
मदन भन्डारी राजमार्ग भएर गुड्ने सवारीको चाप बढेपनी नियमित रुपमा, मापसे, लापसे, तीब्र गतिको लगाएतको चेकजाँच र ट्राफिक सचेतनामुलक कार्यक्रमका कारण सवारी दुर्घटनामा कमि आएको ट्राफिक प्रमुख दियालीले बताउनु भयो ।
साथै उहाँले दुर्घटना न्यूनीकरणका लागि ट्राफिक प्रहरीको नियमित कार्य जारी रहने भन्दै, यसको लागि प्रहरी मात्रै नभइ आम सर्वसाधारण सवारी धनी, यातायात मजदुर, एवम् सरोकारवाला निकायका सबैको साथ सहयोग उत्तिकै अपरिहार्य रहने धारणा व्यक्त गर्नु भयो । पछिल्लो समयमा मापसे (मादक पदार्थ सेवन) लापसे (लागू पदार्थ सेवन) गरेर सवारी चलाउने क्रम बढेसङै त्यसलाइ न्यूनीकरण गर्न चेकजाँचलाई तीव्रता दिइने र तीब्र गतिमा सवारी चलाउनेलाई कारवाहिको दायरामा ल्याउन गति मापक राडर गनको प्रयोग गरिने समेत उहाँले जानजारी दिनु भयो ।
गत आर्थिक बर्षमा सवारी दुर्घटनामा ३ वटा चौपायाको मृत्यु र १ घाइते रहेकोको मा आर्थिक बर्ष २०७९/०८० मा कुनैपनी चौपायाको मृत्यु र घाइते नभएको जनाइएको छ ।
प्रतिकृया दिनुहोस्