उदयपुर । असाधारण व्याजको भारी बोकाएर व्यवसाय धरासयी बनाएको भन्दै बैंकबिरुद्ध उदयपुरका व्यवसायी आन्दोलित भएका छन् । जिल्ला उद्योग बाणिज्य संघ उदयपुरले तत्काल ब्याज घटाउन मंगलबार पत्रकार सम्मेलनमार्फत ध्यानाकर्षण गराएको हो ।
कोरोना महामारीदेखि बिभिन्न प्राकृतिक बिपदबाट गुज्रदै धरासयी बनेको व्यावसायिक क्षेत्रलाई प्रबर्धन गर्नुको सट्टा नयाँ मौद्रिक नीति ल्याएर व्यापारीहरुको ढाड सेक्ने काम भएको वाणिज्य संघ उदयपुरका अध्यक्ष चुडामणी कार्कीले बताए । ‘नेपाल राष्ट्रबैंकको मौद्रिक नीतिप्रति हामी स्तब्ध छौँ’ अध्यक्ष कार्कीले भने, ‘लडेको व्यवसाय उठाउनुको सट्टा यहाँ सरकारबाटै झन् कुल्चने प्रयास भइरहेको छ ।’
त्यस्तै माग पूरा नभए हदैसम्मको आन्दोलनमा उत्रने संघ उदयपुरका महासचिव सुनिल साहले चेतावनी दिए । सरकारबाट व्याजको भार घटाउने प्रतिबद्धता नआए रिले अनसन बस्नेदेखि सम्पूर्ण कारोवार बन्द गरी चलअचल जायजेथा नै सरकार जिम्मा लगाउनेसम्मको आन्दोलन पनि हुनसक्ने महासचिव साहको भनाई थियो । त्यस्तै सचिव युवराज पराजुलीले पनि चर्को व्याजदरबाट व्यापारीहरुलाई पर्न जाने असहजताको सम्बोधन गर्नेपर्ने बताएका थिए ।
स्थानीय साना उद्योगी दिनेस साहलेले भने बैंकहरुले ऋण प्रवाहको प्रक्रिया नै झन्जटिलो भएको आरोप लगाए । तरलताको समय बिभिन्न प्रलोभन देखाएर ऋण बोकाउने बैंकहरुले आफूखसी व्याज बढाएको साहले दाबी गरे । ‘वर्षदिन अघि ८ प्रतिशतले लिएको ऋण अहिले १६ प्रतिशतसम्म बढेको छ ।’ उद्योगी साहले भने, ‘बैंकहरुले अनावश्यक ब्याजको भारी बोकाएर व्यापारी, व्यवसायीलाई बोकाएर जवरजस्ती आत्मह,त्या गराउन खोजीरहेका छन् ।’
यसअघि मंगलबार नै जिल्ला प्रशासन कार्यालय उदयपुरमार्फत राष्ट्रिय वाणिज्य बैंकलाई समेत संघले ज्ञापनपत्र बुझाएको थियो । कार्यक्रममा नेपाल पत्रकार महासंघ उदयपुरका पूर्वाध्यक्ष इश्वर तामाङ, सल्लाहकार भोटराज राई, नेपाल फोटो पत्रकार महासंघ उदयपुरका अध्यक्ष देबराज राई, नागरिकबहस डटकमका सञ्चालक सुखीलाल चौधरी, गाउँपालिका डटकमका सञ्चालक तुलसी कोइराला, नेपाल फोटो पत्रकार महासंघ उदयपुरका सचिव लक्ष्मी पोखरेललगायतका दर्जनबढी पत्रकारहरुको सहभागिता रहेको थियो ।
पत्रकार सम्मेलनमार्फत जारी प्रेस विज्ञप्ती हेर्नुहोस्
प्रतिकृया दिनुहोस्