गाईघाटको निर्माणाधीन सडकको कालोपत्रे सुरु हुने

---

सौरभ आले मगर
समृद्ध नेपाल संवाददाता

गाईघाट / विश्व बैङ्कको सहयोगमा निर्माणाधीन गाईघाटस्थित त्रियुगा नगरपालिका क्षेत्रका विभिन्न १३ वटा सडकमा अब कालोपत्रेको काम सुरु हुने भएको छ । निर्माण कम्पनी आशिष/आशीर्वाद/स्वामीनारायण जेभीका प्रोजेक्ट म्यानेजर राजेश यादबका अनुसार गाईघाट बजारको पिपल चोक-बरुवा सडक,सिटी हल पश्चिमको सडक, बाबारानी डिएम गेट सडक, फूलचोक बोटे टोल सडक, समेत गरी करिब १५ किलोमिटर सडक कालो पत्रे हुने जानकारी दिए ।

नगरवासीको दीर्घ प्रतीक्षा समाप्त हुँदै गरेको जनाउँदै त्रियुगा नगरपालिकाका मेयर बसन्त कुमार बस्नेतले प्रोजेक्ट समयमै र गुणस्तरीय रूपमा सम्पन्न गर्ने प्रतिबद्धता व्यक्त गर्नु भयो । गाईघाटलाई आधुनिक र व्यवस्थित शहरमा रूपान्तरण गर्ने उद्देश्यअनुसार विश्व बैंकको सहकार्यमा भइरहेको यो परियोजना नगरको दीर्घकालीन विकासका लागि महत्वपूर्ण रहेको छ।