उदयपुर / मोतिगडा–जोगीदह सडक खण्ड कालोपत्रे भएको छ। लामो समयदेखि धुलो र हिलोका कारण सास्ती खेप्दै आएका स्थानीयवासीहरूका लागि सडक कालोपत्रे हुनु ठूलो राहतको विषय बनेको छ। त्रियुगा नगरपालिकाका प्रमुख बसन्त कुमार बस्नेत निर्वाचित भएयता आफूले चुनावी समयमा व्यक्त गरेका प्रतिबद्धताहरू क्रमशः कार्यान्वयन गर्दै आएका छन्।
नगरपालिकाको प्राथमिकतामा परेको उक्त सडक खण्डका लागि आवश्यक बजेट व्यवस्थापन गरी निर्माण कार्य अघि बढाइएको हो। सडक कालोपत्रे भएसँगै सवारी साधनको आवागमन सहज भएको छ भने वर्षायाममा हुने दुर्घटनाको जोखिमसमेत न्यून हुने अपेक्षा गरिएको छ। यस सडकले मोतिगडा, जोगीदह तथा आसपासका बस्तीका बासिन्दालाई प्रत्यक्ष लाभ पुर्याउने विश्वास लिइएको छ।
सडक कालोपत्रेपछि लुहाले खोला, कंगमा पुल तथा विभिन्न खहरे खोलाहरूमा निर्माण हुन लागेको पुल तथा कल्भर्टको अवस्थाबारे नगर प्रमुख बसन्त कुमार बस्नेत, लहान सडक डिभिजन कार्यालयका इन्जिनियर, सम्बन्धित वडा अध्यक्ष तथा निर्माण कम्पनीका प्रतिनिधिहरूले संयुक्त रूपमा स्थलगत अनुगमन गरेका छन्। अनुगमनका क्रममा निर्माण कार्य तोकिएको मापदण्डअनुसार, गुणस्तरीय र समयमै सम्पन्न गर्न निर्देशन दिइएको जनाइएको छ।
नगर प्रमुख बस्नेतले विकास निर्माणका काममा कुनै पनि किसिमको लापरवाही सह्य नहुने स्पष्ट पारे। उनले जनताको दैनिक जीवनसँग प्रत्यक्ष जोडिएका सडक, पुल तथा कल्भर्ट निर्माणलाई नगरपालिकाको उच्च प्राथमिकतामा राखिएको उल्लेख गर्दै दिगो र गुणस्तरीय विकासमा जोड दिए।
स्थानीयवासीहरूले सडक कालोपत्रे तथा पुल–कल्भर्ट निर्माण कार्यले यस क्षेत्रको आर्थिक, सामाजिक तथा शैक्षिक गतिविधिमा सकारात्मक प्रभाव पर्ने विश्वास व्यक्त गरेका छन्। नगरपालिकाले आगामी दिनमा पनि आवश्यकताका आधारमा पूर्वाधार विकासका कामलाई निरन्तरता दिइने जनाएको छ।
प्रतिकृया दिनुहोस्