गाईघाट ।उदयपुरको गाईघाटस्थित थरुहट रंगशालामा भोलिदेखि प्रथम त्रियुगा गोल्डकप फुटबल प्रतियोगिता सुरु हुने भएको छ। प्रतियोगितामा नेपालका ७ र भारतको १ गरी जम्मा ८ फुटबल टोलीको सहभागिता रहने त्रियुगा नगर खेलकुद विकास समितिका अध्यक्ष किरण कार्कीले जानकारी दिनुभयो।
कार्कीका अनुसार प्रतियोगितामा भारतको जर्जियन फुटबल क्लब र नेपालका गाईघाट फुटबल क्लब, सलहेस युवा क्लब, न्यु स्टार क्लब, चित्लाङ एफसी, भरतपुर फुटबल क्लब, सातदोबाटो क्लब र नेपाल पुलिस क्लब गरी जम्मा ८ टोली सहभागी हुनेछन्।
प्रतियोगिताको विजेताले नगद ५ लाख रुपैयाँ र उपविजेताले ३ लाख रुपैयाँ पुरस्कार प्राप्त गर्नेछन् भने प्रत्येक खेलको म्यान अफ द म्याचलाई ७ हजार ५ सय रुपैयाँ प्रदान गरिने आयोजकले जनाएको छ।
पहिलो पटक त्रियुगा गोल्डकप आयोजना हुन लागेकोमा त्रियुगा नगरपालिकाका नगर प्रमुख वसन्तकुमार बस्नेतले खुसी व्यक्त गर्नुभएको छ। आफ्नो कार्यकालमा खेलकुद क्षेत्रको विकासलाई प्राथमिकतामा राख्दै आएको उल्लेख गर्दै उहाँले गोल्डकपले स्थानीय खेलकुदको विकाससँगै राष्ट्रिय तथा अन्तर्राष्ट्रिय स्तरका खेलाडीलाई गाईघाटमा प्रतिस्पर्धा गर्ने अवसर प्रदान गर्ने बताउनुभयो।
त्रियुगा नगरपालिकाको सहयोगमा सञ्चालन हुने प्रतियोगिताको समन्वय त्रियुगा नगर खेलकुद विकास समितिले गर्नेछ भने आयोजना गाईघाट फुटबल क्लबले गरेको हो। प्रतियोगिता अवलोकनका लागि दर्शकले प्रवेश शुल्क तिर्नुपर्ने आयोजकले जनाएको छ।
प्रतिकृया दिनुहोस्