अमितकुमार तामाङ –
उदयपुर । हिन्दू नेपालीहरुको महान पर्व बडा दसैं (विजया दशमी) नजिकिदै गर्दा उदयपुरमा पनि चहलपहल बढेको छ । चाँडबाडलाई लक्षित गरी जिल्ला बाहीर रहेका सर्वसाधरणहरु आआफ्नो घर आउने क्रममा छन् ।
त्यस्तै सदरमुकाम र जिल्लाको मुख्य सहरमा कामको सिलसिलामा अस्थायी बसोबास गर्दै आएका व्यक्तिहरु घरतर्फ जान थालेका छन् । टाढा घर हुनेहरु घटस्थापनादेखि नै बाक्लो मात्रामा घर जान थालेको उदयपुरका यातायात व्यवसायी श्रवण चौधरीले जानकारी दिए । उनका अनुसार गाईघाटदेखि पहाडी भूभाग जानेको संख्या अत्यधिक देखिएको छ ।
त्यस्तै काठमाडौं, धरान, बिराटनगर, पोखराजस्ता ठाउँहरुबाट अत्यधिक रुपमा यात्रुहरु जिल्ला भित्रीएका छन् । जिल्लाबाहीरबाट उदयपुर सदरमुकाम गाईघाट आएर पहाडी क्षेत्र (आफ्नो घर) जाने टिकट समेत सहज रुपमा पाउन गाह्रो हुने गरेको खोटाङको बराहपोखरी गाउँपालिका घर बताउने यात्रु कुमार तामाङले बताए ।
अहिले गाईघाटबाट पहाडी जिल्ला खोटाङ, भोजपुर, र ओखलढुंगा लगायतका ठाउँमा जाने यात्रुको पनि बाक्लो संख्या देखिएको छ । जसका लागि गाईघाटबाट यी पहाडी गन्तव्यसम्म पुग्न बिहान ३ः०० बजेदेखि नै बजारको पिपलचोक नजिक सवारीसाधनले यात्रु ओसार्ने गरेको छ ।
कतिपय भने टिकट नपाउदा केही दिनदेखि गाईघाट बजारमा बस्न बाध्य छन् । अत्यावश्यक भएका र रकमको अभाव नभएकाहरुले भने सजिलो ठाउँ हेरी साना सवारी तीन पांग्रे अटो टेम्पो नै रिजर्भ गरेर घर जाने गरेका छन् । गाईघाटदेखि खोटाङ सीमा धाप्लाङ साउने खाबु हुँदै रानीबास, रौतासम्म पनि अहिले अटोले सर्वसाधरण ओसार्ने गरेको अटो चालक सुनील मगरले बताए ।
गाईघाट बजारमा भने दसैं सुरुवातको दिनहरुमा भीडभाड थियो । तर, यहाँ बस्ने अधिकांस सर्वसाधरण पहाडी क्षेत्रबाट अस्थायी रुपमा पढ्न र व्यवसाय तथा जाँगिरका लागि बस्दै आएकाले उनीहरु दसैं बिदामा घर जाँदा बिस्तारै सुनसान हुन थालेको छ । बजारको मुख्यचोकहरुमा राती अबेरसम्म पनि बिभिन्न पसलहरुमा ग्राहकको घुइचो लाग्ने गरेको देखिन्छ ।
प्रतिकृया दिनुहोस्