उदयपुरमा ‘म्यादी प्रहरी’लाई १० दिने तालिम सुरु

---

उदयपुर । उदयपुरमा म्यादी प्रहरीहरुका लागि औपचारिक तालिम सुरु भएको छ । मंसिर ४ गते हुने प्रतिनिधि सभा र प्रदेश सभा निर्वाचनलाई लक्षित गरी सुरक्षामा खटिने म्यादी प्रहरीलाई आईतबारदेखि आधारभूत तालिम सुरु भएको हो ।

 

जिल्लाको निर्वाचन क्षेत्र २ अन्तर्गत सुरक्षामा खटिने म्यादी प्रहरीलाई कटारी नगरपालिकास्थित इलाका प्रहरी कार्यालय कटारीको प्राङ्गणमा तालिम थालिएको छ । इप्रका कटारीका प्रमुख प्रहरी नायव उपरीक्षक रविन कार्कीले असोज ३० गतेदेखि सुरु आधारभूत तहको सो तालिम १० दिनसम्म सञ्चालन जानकारी दिए ।

 

निर्वाचन सुक्षामा खटिने प्रहरीका लागि सो तालिम २०७९ कात्तिक ८ गते सम्म सञ्चालन हुनेछ । जसमा पुरुष १ सय ३७ जना सहभागी छन् । महिला भने ४५ जना मात्र रहेका छन् ।

 

दुवै गरी जम्मा १ सय ८२ म्यादी प्रहरीले सो निर्वाचन क्षेत्रको सुरक्षा गर्ने बताइएको छ । त्यस्तै जिल्ला प्रहरी कार्यालय उदयपुर र इलाका प्रहरी कार्यालय बेल्टार तथा इलाका प्रहरी कार्यालय रामपुर बेलकालगायतमा पनि तालिमको व्यवस्था हुने प्रहरी स्रोतको भनाई छ ।

 

अघिल्लो निर्वाचन (स्थानीय तहको चुनाव) मा खटिएका म्यादी प्रहरीलाई पहिलो प्राथमिकता दिएको छनोट प्रक्रियाबाट आएकाहरु अधिकांस यसअघि नै तालिम प्राप्त भइसकेका समेत छन् ।

 

मुख्यतया निर्वाचनको समय अपनाउनुपर्ने सुरक्षा रणनीति र बुथ सुरक्षा, नागरिकसँग गरिने व्यवहार र चेकजाँचलगायतको विषय तालिममा समावेश गरिने भएको छ ।