उदयपुरको जलजले पोखरीभित्र भेटियो महिला लाश

---

उदयपुर । उदयपुरमा एक महिला पोखरीभित्र मृत भेटिएकी छन् । जिल्लाको त्रियुगा नगरपालिका वडा नम्बर ६ जलजलेस्थित उदयपुर सिमेन्ट उद्योग लिमिटेड परिसरमा रहेको पोखरीमा डुबेर मंगलबार एक महिलाको निधन भएको हो ।

 

जिल्ला प्रहरी कार्यालय उदयपुरका अनुसार मंगलबार साँझ गाईबस्तु चराउन गएकी त्रियुगा नगरपालिका ५ श्रीपुरकी ६० वर्षीया दैया परियारको डुबेर मृत्यु भएको हो । गाईबस्तु चराएर फर्कदै गर्दा हात खुट्टा धुन पोखरीमा पस्दा डुबेर मृत्यु भएको हुनसक्ने प्रहरीले जनाएको छ ।

 

साँझ पोखरीमा डुबेर मृत अवस्थामा अन्य गोठालाहरुले फेला पारेर प्रहरीलाई खवर गरेका थिए । खवर पाएलगत्तै गएको जलजले र जिल्ला प्रहरी कार्यालयको टोलीले उद्धार गरी उपचार गर्न लान खोज्दा उनको मृत्यु भएको जनाइएको छ ।

 

प्रहरीले घट्नास्थलको सर्जमिन मुचुल्का गरी मृतकको शव उदयपुर अस्पतालमा पोष्टमार्टम गरी बुधबार अत्येष्ठीका लागि आफन्तको जिम्मा लगाएको जिल्ला प्रहरी कार्यालय उदयपुरका सूचना अधिकारी राकेशकुमार पोदारले बताए ।

 

स्थानीयका अनुसार सो पोखरीमा ६ महिनाअघि पनि एक महिलाको डुबेर मृत अवस्थामा भेटिएकी थिइन् ् आफन्तका अनुसार जलजलेकै ५२ वर्षीया नशीमाया परियारको गत फागुनमा सोही पोखरीमा डुबेर ज्यान गएको थियो । अहिले मृत्यु हुने दैया र नशीमाया नातेदार नै भएको स्थानीयको भनाई छ । वर्षेनी सो पोखरीमा १÷२ जनाको ज्यान जाने गरेको स्थानीयले बताएका छन् ।

 

प्रहरीले पनि सो पोखरीमा यसअघि पनि पटकपटक मान्छे डुबेर मर्ने गरेको जनाएको छ । चुरे जंगलसँग जोडिएको खाली जमिनक्षेत्र भएको र गाईघाट–लाहान सडकसँग जोडिएको सो पोखरीमा त्यसभेगका स्थानीयहरु गाईबस्तु चराउन तथा घाँस दाउरा गर्न आउने गरेका छन् ।
त्यसैगरी रमणीय र खुल्ला ठाउँ भएकाले युवायुवति तथा बालबालिकाहरु नुहाउन, लुगा धुन, पौडी खेल्न र रमाउन आउने गरेका छन् ।

 

उनीहरु नै पोखरीमा पटकपटक डुबेर ज्यान गुमाउने गरेको स्थानीयहरु बताउँछन् । वर्षेनी यस्तो दुःखद घट्ना हुने सो पोखरीलाई संरक्षण र सुरक्षित गर्नुपर्ने आवश्यक्ता खट्किएको छ । वरिपरि घेराबार गर्ने तथा हात खुट्टा धुन र नुहाउने, लुगा धुने सुरक्षित ठाउँ बनाउन सके घट्ना हुनबाट रोक्न सकिन्छ ।

 

पोखरीमा अप्रिय घट्ना हुनबाट बचाउन उद्योग व्यवस्थापन, प्रहरी, प्रशासन, जनप्रतिनिधि र सरोकारवाला निकाय तथा व्यक्तिहरुले पहल थाल्न जरुरी छ ।